کورونا وائرس کاعورتوں کی نسبت مرد آسان شکار، کیوں؟ تحقیق 

بیجنگ: دنیا بھر میں کورونا وائرس کی وباء تیزی سے پھیلتی جا رہی ہے، اس مہلک وباء کے باعث ہزاروں افراد زندگی کی بازی ہار گئے ہیں، چین سے پھیلنے والی وباء نے 200 سے زائد ممالک کو جکڑا رہا ہوا ہے، اس وباء کے دوران ایک نئی تحقیق سامنے آئی ہے جس میں دعویٰ کیا گیا ہے کہ اس کورونا وائرس سے 65 فیصد ہلاکتیں مردوں کی ہوئی ہیں جبکہ عورتوں کی شرح اموات 35 فیصد ہے۔

تفصیلات کے مطابق چینی شہر ووہان سے پھیلنے والے کورونا وائرس نے اب دنیا کو اپنی لپیٹ میں لے رکھا ہے۔ چینی ماہرین نے مہلک وائرس سے ہونے والی ہلاکتوں کے بارے میں ڈیٹا جاری کیا ہے اور دوسرے ممالک سے بھی ڈیٹا منظرعام پرآرہا ہے۔اس سے ایک عجیب بات سامنے آئی ہے اور یہ کہ وائرس سے عورتوں کی نسبت مردوں کی زیادہ اموات ہورہی ہیں۔

چین کے علاوہ دوسرے ممالک سے منظرعام پر آنے والے ڈیٹا کے حاصلات سے بھی اس امرکی تصدیق ہوئی ہے کہ کورونا وائرس سے مردوں ہی کی زیادہ اموات ہوئی ہیں۔عورتیں بالعموم لمبی عمر پاتی ہیں جبکہ بعض لوگوں نے سوال اٹھایا ہے کہ وائرس کیسے جنسی تفریق کررہا ہے اور اس سے تویہ ظاہر ہورہا ہے کہ آئندہ کورونا وائرس کا کون سی صنف زیادہ شکار ہوسکتی ہے؟

کورونا وائرس سے ہلاکتوں اور اس کے متاثرین کے اعداد وشمار اکٹھے کرنے کا عمل ابھی جاری ہے۔ اس لیے کووِڈ 19 کے بارے میں ابھی بہت کچھ پردۂ اخفا میں ہے اور اس کے پھیلنے کے انداز اور ہلاکتوں کے بارے میں تحقیقات بدستورجاری ہیں۔

تاہم اب تک کے دستیاب ڈیٹا کے مطابق کورونا وائرس سے دنیا کے مختلف ممالک میں عورتوں کے مقابلے میں مردوں کی زیادہ ہلاکتیں ہوئی ہیں، وہی زیادہ متاثر ہوئے ہیں یا ہورہے ہیں۔
چین کے مرکز برائے انسداد امراض کی 11 فروری کو شائع شدہ رپورٹ کے مطابق کورونا وائرس سے تب تک ملک میں مردوں کی شرح اموات 2.7 فیصد تھی اور عورتوں میں شرح اموات 1.7 فیصد تھی۔ اس مرکز نے چین میں کورونا وائرس کے تب تک 44 ہزار کیسوں کا جائزہ لیا تھا۔

اس کے بعد سے دنیا کے کم وبیش تمام ممالک میں کرونا وائرس پھیل چکا ہے۔ دنیا بھر میں ہلاکتوں کی تعداد 75 ہزار سے متجاوز ہوچکی ہے اور 10 لاکھ سے زائد افراد متاثر ہوئے ہیں۔ تمام ممالک اپنے ہاں کورونا وائرس کے متاثرین کا ڈیٹا اکٹھا کررہے ہیں اور اس کا تجزیہ کررہے ہیں۔ان حالیہ مطالعات سے بھی بات سامنے آئی ہے کہ کورونا وائرس سے مردوں میں شرح اموات عورتوں کی نسبت زیادہ ہے۔

گلوبل 50/50 منصوبہ کے 3 اپریل تک جمع کردہ ڈیٹا کے مطابق اٹلی اور سپین، دونوں ملکوں میں کورونا وائرس کے 69 فی صد مہلوکین مرد تھے۔ ابو ظبی میں واقع کلیو لینڈ کلینک میں متعدی امراض کے معالج ڈاکٹر ماہر بالقیس نے حاصلات کی تصدیق کی ہے۔ انھوں نے ابتدائی ڈیٹا کے حوالے سے بتایا ہے کہ دنیا بھر میں کووڈ-19 کے 60 فیصد کیس مرد حضرات کے ہیں۔ چین کی ایک تحقیق سے بھی یہ ظاہر ہوتا ہے کہ کورونا وائرس سے 65 فی صد ہلاکتیں مردوں کی ہوئی ہیں جبکہ عورتوں کی شرح اموات 35 فی صد ہے۔

انھوں نے کہا کہ دنیا بھر سے جمع کردہ ڈیٹا سے یہی ظاہر ہورہا ہے کہ عورتوں سے زیادہ مرد حضرات کورونا وائرس سے متاثر ہورہے ہیں۔ نیز ڈیٹا ظاہر کررہا ہے کہ مہلک وائرس سے مرد زیادہ شدید بیمار پڑ سکتے ہیں اور پھر موت کے منہ میں جاسکتے ہیں۔ تاہم ڈاکٹر ماہر کا کہنا تھا کہ ڈیٹا ابھی ابتدائی ہے اور اس پر مزید کام کرنے اور مزید نمونے حاصل کرکے ان کے تجزیے کی ضرورت ہے۔
امریکا سمیت بعض ممالک فی الوقت جنس کی بنیاد پر ڈیٹا جاری نہیں کررہے ہیں، جس سے سائنس دانوں کے لیے بڑا ڈیٹا بیس تیار کرنا مشکل ہوجائے گا کیونکہ سائنسدان ابھی تک جمع کردہ اعداد وشمار سے سیکھ رہے ہیں۔ انھیں مضبوط تجزیے اور حاصلات کے لیے زیادہ ٹھوس ڈیٹا درکار ہے۔ کورونا وائرس سے مرد وعورتوں کی ہلاکتوں میں عدم مساوات کی اب تک مختلف وضاحتیں پیش کی گئی ہیں۔ ڈاکٹر بالقیس کا کہنا ہے کہ اس میں طرز زندگی اور کردار کا بھی بڑا تعلق ہے۔مرد بیماری کی علامات ظاہر ہونے کے بعد کم ہی کسی طبیب سے رجوع کرتے یا طبی مشورے پر عمل کرتے ہیں۔

محققین کا کہنا ہے کہ مرد حضرات کے کووڈ-19 سے مرنے کی ایک اور وجہ ان میں شراب اور سگریٹ نوشی کی عادت ہے۔ ان دونوں کی لت سے بیماری کا شکار ہونے کےامکانات بڑھ جاتے ہیں اور یوں کورونا وائرس کا شکار ہونے سے ایسے مردوں کے مرنے کے امکانات بھی بڑھ جاتے ہیں۔
بعض مطالعات سے یہ بھی ظاہر ہوا ہے کہ مرد اپنے ہاتھوں کو کم دھوتے ہیں جبکہ ماہرین اس مہلک وائرس سے بچاؤ کے لیے ہاتھوں کو وقفے وقفے سے صابن اور صاف پانی سے دھونے کا مشورہ دیتے ہیں۔ بعض ماہرین کے نزدیک جنس کی بنیاد پر جسم کے مدافعتی نظام میں بھی فرق ہوتا ہے۔

ڈاکٹر ماہر بالقیس کا کہنا ہے کہ خواتین کورونا ایسے وبائی وائرس کا مردوں کی نسبت کم شکار ہوتی ہیں۔اس کی ایک وجہ ہے کہ ان میں خود کار مدافعتی نظام بننے کا زیادہ امکان ہوتا ہے۔ ہارمون کے توازن اور جینیاتی عوامل کا بھی اس عدم مساوات سے تعلق ہے۔ خواتین میں آسٹروجین بھی مردوں سے زیادہ ہوتے ہیں اور ان میں وائرس کے مقابلے میں مدافعت کو بڑھانے میں اہم کردار ادا کرتے ہیں۔

انھوں نے مزید بتایا ہے کہ جینز کی نمایاں تعداد بھی مدافعتی ردعمل کو منظم کرتی ہے۔ یہ ایکس کروموسوم پر ان کوڈ ہوتے ہیں اور کروموسوم عورتوں میں دو ہوتے ہیں جبکہ مردوں میں ایکس کروموسوم ایک ہوتا ہے۔ مرد اور عورت کے مدافعتی نظاموں میں فرق کے بارے میں ابھی تحقیق جاری ہے۔